بحجم ضيف (لقاء شاعر) لهذا الاسبوع ندعوكم الى الاستمتاع بالحديث وبالقصيد ..مع شاعر الٲثير غازي بن عبدالله الرويلــي

🔘بطاقة تعريف بشاعرنا القدير ؟

غازي عبدالله الرويلي عضوفي منتدىالملكسلمانالرسمي
عضو التجمع الاعلامي ولجنة شعراءالتجمّعالاعلاميلقبيلةالـــــرولة
عضو في نخبة الشموخ الادبية
وفي قريةزايدالتراثية
وفي مجموعةاثيرالابــــــداع .

❀ـــــــــــــــــــــــــــــــــــــــــــ❀

🔘 قصيدة من روائعك شاعرنا نبدأ بها حوارنا .

            زمان القطين

ألا ليت بعض اللي مضالي رجع ورا
واشوف اللذي تبي العرب قرب منزاله

زمان القطين وكل بيتٍ له اقصرا
قرنين ومثولث وقطبه وعرزاله

زمانٍ مضى ماصار مثله ولا جرا
بقايا ارسومه يبطي الوقت مازاله

لياليٍ مضت مع صاحبٍ كل ماطرا
يهز الحشا مع صفقة الموج زلزاله

اجي له وهو عن حاجة القلب مادرا
اما اقرب المجلاس والا اجلس اجزاله

واذا حط عن بعض العرب بيننا ذرا
تبسّمْت لاطق الخواتم بمغزاله

كأنه يقول اذا اخر مسيرٍ سرا
تفضل على المقسوم من صافي ازلاله

وترا اللي ايقدم لك فلا لك به اخشرا
ونبي منك حشمة مايقدم عن اهزاله

وحشمته وشلت الجرح ينزف ولا برا
ولا قيل من بين العرب كثرت ازواله

                 غازي عبدالله الرويلي

❀ـــــــــــــــــــــــــــــــــــــــــــ❀

🔘 شعراء كان لهم الأثر في بداية مسيرة غازي بن عبدالله الرويلي ؟

ج: الشاعر خالد رمضان السويلمي
هو الوحيد اللي اثق في رايه منصح لي باخلاص وبيننا صداقه وعلاقه متينه. الى الآن
❀ـــــــــــــــــــــــــــــــــــــــــــ❀

🔘هل القصيدة بالنسبة للشاعر حصن يحتمي بها من ثوراتة الداخلية ام هي نافذة يطل من خلالها على اشيائه الجميلة؟

ج: كل الاثنين

❀ـــــــــــــــــــــــــــــــــــــــــــ❀

🔘موقف استفز شاعريتك وكتبت على إثره قصيدة

نعم موقف وكان صدفه والحقيقه ماهو استفزاز وانما. تأثرت منه دار بيني وبين احد الشعراء. حديث ومن خلال الحديث قال لي قصه جرت عليه يوم سمعت القصه تأثرت وكتبت

شف الصدفه اللي من رفيقٍ ماهو بالبال
رفيقٍ لحرف القاف ماني على باله
يقول بلسان الحال عن ماجرى للحال
وانا مصغيٍ سمعي ومنصت لما قاله
حكى لين قلت الله ي انت عشت اهوال
قطعت لحديثه قلت صبرك وش اقباله
سكت برهه من الوقت غص بكلامه قال
لونه جبل صبري رثن حاله جباله
وش ارجي على صبرٍ جزاه العذاب اشكال
وش اللي بقي له من عذابه ولا ناله
شموخ الكرامه مارضى الذّل والإذلال
ولا فيه حال انسان باقيٍ على حاله
م دام انعدل لي كل وقتٍ عليّه مال
حمدت الله اللي كل حيٍ تلاجاله
وشف الصدفه اللي دار فيها الكلام وطال
هي احلا الصدف لاصار كلٍ على فاله

          غازي عبدالله الرويلي

❀ـــــــــــــــــــــــــــــــــــــــــــ❀

🔘من خلال تجربتك الشعرية الطويلة كيف ترا مستوى الشعر الآن عن قبل ؟

انا من وجهة نظري ان الهزل والجزل موجود مثل ماهو موجد الآن لكن الوسايل اللي كانت هي المنفذ الوحيد للشعر. كانت تلتزم بقيود صارمه على عدم اظهار اي قصيده من خلالها الا اذا كانت بمستوى الظهور ومنها اصبح الشعر الضعيف والهزل والغث. ماله نصيب بالظهور وحتى الناس ماتتناقل بينها الا القصيده الجزله
اما اليوم انفتح الباب على مصراعيه لكل شي وظهر كلام لايرقى حتى لمستوى الكلام النثري. ونجده مذيل باسم الشاعر او الشاعره. وبنفس المسار وجد من يصحح وينشر له
❀ـــــــــــــــــــــــــــــــــــــــــــ❀

🔘هل كل من كان شاعر يصح ان يقال عنه ناقد ؟
وماهي المميزات اللتي يجب ان يمتلكها الشاعر الناقد ؟

لا ماهو كل شاعر. بل قليل جدا يكون ناقد وشاعر
لان النقد يحتاج قرأة النص والاحساس العميق بالنص بتذوق
المميزات اولا يحتاج وقت ومكان مناسب وحاله خاصه تكون موجوده تشبه حالة الشاعررعند كتابة القصيده

وتكون القراءة الأدبية تتم على مستويين:
 في القراءة الأولى يسلم الناقد نفسه للعمل، أي أنه يمارس قراءة النص بوصفه قارئاً متذوقاً للأدب ومدرباً على هذا التذوق، وعادة ما يخرج من هذه القراءة بانطباعات تختلف من عمل إلى آخر، فقد يخرج بالشعور باكتمال المتعة، أو بالشعور بأن شيئاً ما خطأ

 وفي القراءة الثانية يقيد انطباعاته مطبقاً للمنهج التحليلي على العمل الفني ومتبيناً للعلاقات التي تجمع الجزئيات في كلية فنية.
ويضاالقراءة الابداعية لازم يطبق فيها التالي

القراءة الحرفية قراءة الأسطر
و التحليلية قراءة ما بين الأسطر
والناقدة قراءة ما وراء الأسطر
فإن القراءة الإبداعية قراءة ما هو خارج الأسطر
وبالتالي هي قمة مستويات الفهم القرائي لأنها عصارة التجارب وثمرة القراءات
والقراءة الإبداعية أعلى درجات السلم في مراحل القراءة؛ فمن لم يفهم شكل النص”الحرفي ” أو لم يحلل النص جيدا فإنه لن يصل إلى القراءة الإبداعية “الجيدة على الأقل “

❀ـــــــــــــــــــــــــــــــــــــــــــ❀

🔘موضوعات الشعر كُثر بالتأكيد كتب شاعرنا في العديد منها وابدع فماذا قال عن :

الــوفاء

ياصاحبي ياللي قطعت المواصيل
لاتحسب انك زرتني طيف عابر

انا سندك ليا تردى بك الحيل
ي حتجتني ترني على مانت خابر

اوقف معك وقفة كريم الرجاجيل
رجلٍ يحب الطيب من روس اكابر

واشيل عنك اللي ثقيلٍ من الشيل
للجرح ضمّادٍ وللكسر جابر

        غازي عبدالله الرويلي

❀ـــــــــــــــــــــــــــــــــــــــــــ❀

🔘المجموعات الشعرية تتفاوت في خدمتها للشعر.. من وجهة نظر شاعرنا ماذا قدمت للشعر وما أثرها علية ؟

كل شي له ايجابيات وسلبيات وهذا ينطبق على
والمجموعات الشعريه. لكن من وجهة نظري ان ايجابيتها اكثر من سلبيتها. لانها. قربت من المسافات ومدت روح التواصل بين الشعراء والشاعرات وهذا اوجد اكتساب الخبره لمن لم يكون لديه الخبره الكافيه
❀ـــــــــــــــــــــــــــــــــــــــــــ❀

🔘قصيـدة مختارة

   لذيذ المذاق

الا يا قـديـــم كل ما قلت خليته
تفره دواليب التفاكير وتجيبه
زمانٍ مضالي بين ضحكه وتنهيته
الا ليتها ماكان دارت دواليبه
ذكرته ومني كل حيٍ ذكر ميته
وشعرت بخفوقي ماتضبه محاديبه
احسه سمعني يوم انادي وناديته
تسمع صدى صوت الخفوق وتراحيبه
دوايه بلم الشمل من عقب تشتيته
بشوفة لما لطفِ وساع مهاديبه
ياوردٍ حمل وردٍ بكفه وشميته
واقول انت عطره منك عطره يماريبه
احن لحنانه كل ماذكره احييته
واحس الحشا صلف الهبايب تومي به
سكبته بفنجال الغلا ثم تقهويته
لذيذ المذاق وصافيات مشاريبه
ولا كل عطشان من عروقي ارويته
جرحها الضما والقيض حامي لواهيبه
رضيت بقليله عن كثير تحريته
ولو كان قلبي منه ماكثر مطاليبه
اجي له وانا عن حاجة النفس ماطريته
مدامي معه ضيف بحكمة معازيبه
واذا شلت منه بخاطري عنه خفيته
ولا احاول انه ينتبه له ويدري به
على شان ماكدر مزاجه لياجيته
طروبٍ لعوبٍ هايمٍ في تعاجيبه
صفالي مثل ماني على الود صافيته
مقره سكن بالروح وشلون ابي اصخيبه
ليامن نوى قطع المواصل ترجيته
يدوم الوصال ولا يقاطع مكاتيبه
ولكن حداه لوقت مصعب مواقيته
فرقنا الزمان اللي نكابد مصاعيبه

غازي عبدالله الرويلي

❀ـــــــــــــــــــــــــــــــــــــــــــ❀

نشكر الشاعر والناقد القدير غازي عبدالله الرويلي الذي كان معنا في هذة الاطلالة الجميلة على قرّاء صحيفة شمران ( الاوائل)وفقرة لقاء شاعر ..

كلمة أخيرة منك نختم بها هذا الحوار الممتع.

كل الشكر لك استاذه ريف شمران على اهتمامك بالشعر والادب الراقي ولا يفوتني ان اشكر صحيفة شمران الاوائل وهي دايما من الاوائل
والشكر موصول للقائمين عليها وتحية ود ومحبه للقراء الكرام

…………..